នារសៀលថ្ងៃពុធ ទី២២ ខែមករា ឆ្នាំ២០២៥ ឯកឧត្តម អ៊ុច បូររិទ្ធ អនុប្រធានទី១ ព្រឹទ្ធសភា បានអញ្ជើញចូលរួមពិធីបើកកិច្ចប្រជុំគណៈកម្មាធិការអចិន្រ្តៃយ៍នៃសភាប្រើភាសាបារាំង(Réunion du Bureau de l’ Assemblée Parlementaire de la Francophone) នៅទីក្រុងកាន់ថឺ (Can Tho) នៃសាធារណរដ្ឋសង្គមនិយមវៀតណាម។
ក្នុងសុន្ទកថាបើក ប្រធានរដ្ឋសភាវៀតណាម លោក Tran Thanh Man បានអះអាងថា វៀតណាមជានិច្ចកាលគាំទ្រគុណតម្លៃស្នូលរបស់សហគមន៍នៃប្រទេសនិយាយភាសាបារាំង (Francophone) ជាពិសេសរួមមាន សន្តិភាព ប្រជាធិបតេយ្យ ភាពចម្រុះនៃវប្បធម៌និងភាសា សាមគ្គីភាព និងការអភិវឌ្ឍ។ ប្រធានរដ្ឋសភាបានវាយតម្លៃខ្ពស់ចំពោះតួនាទីរបស់ APF ក្នុងការជំរុញកិច្ចសហប្រតិបត្តិការអន្តរសភា ការកសាងនីតិរដ្ឋ សិទ្ធិមនុស្ស និងការពង្រីកការប្រើប្រាស់ភាសាបារាំង ក៏ដូចជាក្នុងការលើកកម្ពស់សំឡេង និងតួនាទីរបស់សមាជិកសភាក្នុងបញ្ហាអន្តរជាតិ និងតំបន់។
សូមជម្រាបជូនថា របៀបវារៈនៃសន្និសីទនេះផ្តោតលើការពិភាក្សានយោបាយស្តីពី “តួនាទីរបស់សភាប្រើភាសាបារាំង ចំពោះការប្រឈមមុខនឹងការផ្លាស់ប្តូរសណ្តាប់ធ្នាប់ពិភពលោក” ដោយគិតគូរពីស្ថានភាពនយោបាយដ៏ស្មុគស្មាញក្នុងរដ្ឋសមាជិកមួយចំនួន និងការអនុម័តផែនការសកម្មភាពសម្រាប់ការអនុវត្តក្របខ័ណ្ឌយុទ្ធសាស្រ្តសម្រាប់ឆ្នាំ២០២៣-២០៣០ ព្រមទាំងបញ្ហាសំខាន់ៗផ្សេងទៀត។ កិច្ចប្រជុំនេះប្រព្រឹត្តចាប់ពីថ្ងៃទី២២ រហូតដល់ថ្ងៃទី២៤ ខែមករា ឆ្នាំ២០២៥៕

ប្រភព៖ ខុទ្ទកាល័យឯកឧត្តមអនុប្រធានទី១ព្រឹទ្ធសភា